Toshkent Fotosuratlar uyida Tailand Qiroli, fotografiya san’ati bo‘yicha "FotograNica” xalqaro mukofotining sovrindori Pxumipon Adulyadet – Rama IX foto asarlarining ko‘rgazmasi boshlandi.
Mazkur tadbir O‘zbekiston Respublikasi Tashqi ishlar, Madaniyat va sport ishlari vazirliklari, O‘zbekiston Badiiy akademiyasi hamda Tailand Qirolligining mamlakatimizdagi faxriy konsulligi hamkorligida tashkil etildi. Ko‘rgazmaning ochilishida foto san’ati ustalari, musavvirlar, san’atshunos olimlar, yurtimizda faoliyat ko‘rsatayotgan xorijiy diplomatik korpus vakillari ishtirok etdi.
O‘zbekiston Respublikasi madaniyat va sport ishlari vaziri T.Qo‘ziyev va boshqalar Prezidentimiz Islom Karimov rahnamoligida yurtimizda ma’naviyat va ma’rifat, madaniyat va san’at sohalarini yanada ravnaq toptirish, uning o‘ziga xos an’ana va maktablarini boyitish, yoshlarni har jihatdan komil inson etib tarbiyalash borasida amalga oshirilayotgan ezgu ishlar O‘zbekistonga jahon miqyosida qiziqish va e’tiborning tobora ortishida muhim omil bo‘layotganini ta’kidladi.
Istiqlol yillarida yurtimizning jahon mamlakatlari bilan do‘stlik va hamkorlik munosabatlari tobora ravnaq topib borayotir. Jumladan, mamlakatimiz bilan Tailand Qirolligi o‘rtasida o‘rnatilgan do‘stona aloqalar samarasida ikki davlatning ijodkorlari, musavvirlari, foto va sport ustalari O‘zbekiston va Tailandda o‘tkazilayotgan xalqaro festivallar, san’at haftaliklari, xalqaro biyennalelar, yirik sport musobaqalarida muvaffaqiyatli ishtirok etmoqda.
Ko‘rgazmada Tailand Qiroli Rama IXning ushbu mamlakat hayoti, bugungi kuni, tabiati, me’moriy obidalari, xalqining udumlari aks ettirilgan o‘ttizdan ortiq foto asarlari namoyish etilmoqda. Fotografiya ravnaqiga qo‘shgan ulkan hissasi uchun Rama IX "FotograNica” xalqaro mukofoti bilan taqdirlandi. "O‘zbekiston madaniyati va san’ati forumi” jamg‘armasi, O‘zbekiston Respublikasi Madaniyat va sport ishlari vazirligi, Badiiy akademiya, YUNESKOning yurtimizdagi vakolatxonasi hamda Toshkent Fotosuratlar uyi tomonidan 2010 yilda ta’sis etilgan ushbu mukofotga Vatanimiz va jahonning bir qator eng mohir fotoustalari sazovor bo‘lgan.
Ko‘rgazma doirasida tailandlik delegatsiya a’zolariga ushbu mukofot tantanali topshirildi.
– Ko‘rgazmaga qo‘yilgan suratlar hali bizning vatanimizda ham namoyish qilinmagan, – deydi Tailand Qirolligi Senatining Sport ishlari masalalari qo‘mitasi raisi Narumon xonim Sirivat. – Rama IX hazrati oliylarining "FotograNica” xalqaro mukofoti bilan taqdirlanishi, uning ijodiga mansub ko‘rgazmaning O‘zbekiston poytaxtida namoyish etilishi biz uchun yuksak sharafdir. Yurtingizga tashrif chog‘ida Prezident Islom Karimov rahnamoligida madaniyat, san’at, sport rivoji yo‘lida ulkan e’tibor va g‘amxo‘rlik ko‘rsatilayotganiga guvoh bo‘ldik. Bularning barchasi xalqingizning yuksak ijodiy-intellektual, yaratuvchanlik va bunyodkorlik salohiyatidan dalolatdir.
